Illum imdorrijin illi fil-knejjes tagħna naraw ħafna statwi, xi wħud minnhom ġawar ta' arti. Il-kelma vara tfisser dik l-ħaġa, tkun xi tkun, li tinġarr bħala ċentru ta’ devozzjoni ewlieni tal-mument. Din setgħet tkun xi ikona, relikwija jew xi tpinġija fuq l-injam.

​

L-ewwel vari għamla ta’ statwa kienu jikkonsistu fir-ras, idejn u saqajn tal-injam, kompozzizzjoni jew karatpesta, li kienu jinżammu merfugħin ħalli meta tasal l-festa iwaħħluhom ma’ korp tat-tiben ppakkjat biċ-ċraret u jlibbsuhom ilbies għall- okkazzjoni. Wara bdew deħlin statwi tal-injam. Fis-seklu dsatax bdiet dieħla l-arti plastika jew kartapesta. L-istatwi tal-kartapesta kienu orħos biex isiru, u aktar ħfief biex jinġarru. Dawn saru ħafna popolari u nxterdu ma kullimkien.